يا صفنة.. يا صفنة شعر من آية الوجدان

يا بحة دمع من كل گلب ولسان

يا كشخة قصيدة من يجيهة العيد

يعگال القوافي من تطب ديوان

يا جلعة سكر.. مو سكر بيك الضيم

من لذة نبيذك يرتوي العطشان

سكرة موت صلفة شگد وكيحة وياك

من باگت انفاسك بيهة صبرك خان

اريد ويه المراثي عليك ألعب شوط

وانازلهم شعر كل رابح وخسران

وأعلمهم عليك شما يجيك الليل

تكتب عالگمر وي نفخة الدخان

حالف.. والله آنه حالف ما اگولن متت

لو مرحوم مات الموت بيك وما متت عريان

يا تل الورد ها كثر بيك تفيض

يفوح الطيب منك رازقي وريحان

وطن شنطاك غير السجن والتعذيب

وغربة روح تبچي مگابله الحيطان

بغداد سلاسل حددت رجليك

واشواكك سجن صارتلك وسجان

وحق صبرك.. على المر والثلج بشتاك

من جان البرد بيه الجمر بردان

ومن چانت حلوگ تغازل الطاغوت

وأشباه الرجال الكاظه البيبان

طولك چان عالي وما حنيت الراس

والله طولك چان عالي وما وطيت الراس

لا وصخت قلمك لا ضميرك خان

منك اعترفلك علمتني اختار

دربين العمر لو ذلة احني الهام

لو شامخ اصيل وللشرف عنوان

يا عرياااان.. عريااااان.. ما فضت بعدهه مشتتات البال

والمعيبر عبد حزان يا عرياااان

كلهه تحزمت ضدنه وخذلنه الضيم

وتوالم علينه الشات والسرحان

واخذنه الروج.. شرچي وما وصلني الگيش

وسكان السفينة بچف الف ربان

ــــــــــــــــــــــــــــــــــــــــــــــــــــــــ

* ألقاها الشاعر في حفل الذكرى التسعين لتأسيس الحزب       

    الشيوعي العراقي المقام في بغداد