انـتـه اوّل ورده
ذبـحو شـوگـها .. ودفـنو عطـرها
ونـتـه اوّل غـيم ثـائـر
لمـلـم ابـروحـه الـرعـيـد
وبـشَّر الـگـاع ابـمـطـرها
ونـتـه اوّل مـن سبح بـشطـوط دمّـه
ودگ صـواري الشـوف بمتونه وعُـبرها
ونـتـه ذاك
الصـاغـك المـوت اعـلـه كـيفـه
صوغـة الـمـيّت زفـافـه
وصـيت الگـلاده ابشـذرها
ولـو عطـش كـاس الوطـن يـشرب شـباب
وعطشت الگـاع اعله صبرك
ياعـوافي الگـاع مـن تـشرب صبـرها
واشتـهاك الـمـوت..
لـيـرة...
وعـوز ..
وعـگال ..
وغُـوَه امعـرِّس
يناموس الـشُبگ ظِـلَّـه
وضُـوه اليـذبـح عِـفَه الـهِندِس
يبـعـد اهـلـي...
الـملـح بـارود مـن يـزعـل
خيـانه .... ولـيزر القـناص
خـطّ اعـلـه النـحر محـبس
طـحت والبيك يتعذر
يشنهي الموت
ونـتـه مـن العـشگ ريـتين تـتنـفس
نِفَـس منـهن عـطر مـلگاك بالـجنه
ونـفس بـيرغ يهـزّ الديـره لو هوّس :
( يعـراگ.... البـاگـك ناطـورك )
( يعـراگ .... الباگـك ناطـورك )
ونـتـه بظنـون الـعطش
جـنحان غـيم وطاري دهله
اتـسابـگ الريـح ابـمـهرتـك...
شايل اجناغ الفرات لحضن دجله
ونته نـجمة غـبشه ماغاضت فجرها
وحاشه طبعك يوم عن فجرك بـطيت
ونـتخـيت...
ونخـوة الجـربه تـهز بـاب الضـريح
وبـْحـرت بلـروح تـحدي
اشـراع غـيـره.. والوكـت عاصـف وريـح
ونـتـه بيـك الـلاّء بــذره ورابـيه بگـاع الطـفـوف
وكـل نبـض ثـائـر يـصيـح
ياوكـت..... طـبعـك وكـيح
اومـدّو اچـفوف الـرذيله تـبوگ صيتك
هدّو اشطـوط المذله
وماطفـو قدّاس نِـيتـك
لاچـن النيّه مـناره والـوطن سيـد يشوّر
يللّي سـت الاف مرت... عُـمُـر بيتك
يابـو رايـه... ادخـيل بـختك
رادو يـبدلون لونـك
والهـويه تـصير سـوده
بس ضميرك بـصمه مافـارگ هويـتـك
حشّمو حـته العـواهـر...
مادرو تـشرين طـاهر
صاحـو ابـنـاء السفـاره اتـريد دار
ذولـه جـوكر ...... ذولـه عـار
ذبـحو العـش و الـحمام
وشبّـو ابكـل خـيمه نـار
وهـذا شـان الذيـل طـبعه
ايـصيـر لِلـسَطَّـه جِـعِيـد
اوصـبغو الحـيطان حـمـره
وزتـو الطـلقـه بـريـد...
ومادرو بالـدنيـه حِـبلـه
و طـلگـة الطـلـقـه ولـيـد
ومادرو تـشريـن واحـه
ابكـل شـبر قـَدَّح شـهيـد
وحتـه گـبـرك ... ماسـلم مـن الرعـاع
خافـو يـخـضر عطـر دمـك نـشيـد
وخافـو اهـلال الـقضيه يزور گبـرك
مـادرو..
صـرت انـتـه
بطفـوف الـوطن مـشروع عـيـد
ولاتـظـن تـشريـن يـطفـه...
ولاشـمـس تـشريـن تـغفـه
اشـمـا تـغيـب الـشمـس حـرّه
الحُـرّه تـبـزغ مـن جـديـد