وكنت أسمع وقع قطراته في تخاطراتِ الروح مع أُمِّ الشهيد.

يُمّه ..

أوّل ضوه فكّيتَه إعله طولك وانطفَه

تعرض اعيونك واجيلك كَبل شبّاچ الصبح

ماني فلّيت الحزن بأول كَصيبه الشوفِتَك ..

يُمّه درب الشوكَ بعيوني جزيره

وانت َ المعدّي عله الغيمه ابضفيرة ماي زركَه ../

ماتعدّيت إعله روحي ! الليله ضكّاني السهر والنوم طيرَه

يُمّه نكَّاط الندَه ابلعب التراچي ايكَّطر اسمك ..،

وانت َ بس تسيورة ايدك من تجسني ، كَلبي يصفَه ، إو دفّي الملوَّن يجيني

بُكشة اهدومي اتّطشر من خيالك ،

طويَّة الثوب المكشكش تنفتح بصبِع عرس شبعان حنَه

واْستحي من ثوبي كلّش من يسميني يحلوَه

إو ياحلاتك ع الشريعه ،

 الماي فَر ابطولك إو دار النهر ، ياصوب اعاتب لوضعت ..؟

يُمّه

حتّه امرايتي امن اتمرَّه بيهه ..،

ايلوح وجهك والحكَ ارموشك وافيي ابسدهن ..اشّاه يابرد

وادري كسرات الخواطر..،

 تنجبر بالشبكَه والحبَّه تِنشف الريج وانت َ ابخاطري اتكاسر حليب ..،

چَن سنَه ابكل كَطرَه تكبر

والعُمر يمّك وصَل بعيوني تركض ، ياقلَم دشداشتك لوَّن وجنتي

يُمّه درب المدرسه ابروحي ايتلوَّه إو ما لكَيت ابدفترك شطبَة غلط .

.....،

من ترست الشوف ، ماشفتَك تجي

ما وِسَع عيني ولا شبّاچ وارموشي عله الجامات نبتن

مادريت اتمولح العين التغط بالنوم لو مامش حلم ..؟!

وأنه كَبل النوم، ملح العين ع السجّادَه يكَطر .

يا عُمر ..

عدّيت چنّك ..ما عَرَفْت أُم الوَلد  ع الريحه تنطِر ..؟!

يُمّه حته ابموتتي واسمع حليبك بالصدر شهكَة عطر ../

يمّه چَن عطرك ابخيطَه اعيون وامن ابعيد اهيسَك جاي تندلني

ما بعد لذّة حرارة دمع فوكَ الخد يَمن بصبع الموت اتريد تندهني ..!