( 1 )

هيَ الثامنة ُ والثمانون

الحزن ُ ورد ُ في العيون

والملح ُ بين َ الجفون .

وإنَّ التجاعيد َ ان ْ لاحت ..،

ففي وجه ِ الصبيِّ اجمل ُ ماتكون..!

 ( 2 )

كَبل ماينرسم ..،

صوره اعله لوح الطين

كَبل ما ينكتب اسمه اعله برديّه

لكَيناه ابرفيف الروح  .. ،

لاينشاف ، لا ينجاس ..،

 بس طوله نهر واخياله شماليّه.

عَرف سرّ الشمس .../

من مرّت حدر جفنه ولا تحركَ

صحه ابنجمة صبح ..،

/ سيدوري / تلعب بالشذر كاسات ..،

تقره البعدَه ما مكتوب ، واتْعلم الملك حِكْمَه.

ولا فك حزنه بالصفنه ..،

عُبر طوفان ثاني ابصحوة الأوّل../

ولو كَالوا عليه يغركَ ..،

ولو خيط العمر عرّافه كَال اسود

 رَد بالحلم ..

 رَد بالصحو  ..

  شارة بخت بالشدّات تتعلكَ

 عُمْرَه  الماتِعدَّه اسنين  ..،

هاي الشمس دورة عمره وابروحه ..،

نهار إو ليل تتمشركَ .

....

يمن درت العمر مكَلوب لاتحزن ..،

سماك ابغابة الدخان.. بس ينشاف حيل ازركَ

تِمر مرّ الصور بالعين ..لا تنمحي إو لا تنشكَ ...

  ( 3 )

والصبح بمرايتك ../

وجه الحبيبه خبز...

والناس توكَف بالشعر خنجر

جبت / الجريده / حرز

وامّن رفيف الكَلب.. چان اعله حرفك يفز

واشكَد عاندت بيك السهر والنوم ..،

طعمك مدرسه إو بالدفتر استهلال

وابأول نشيد اتكَوم .. حتّه ابغيبتك جتّال..!

ياعشكَك نهر والعمر متخوصر ابجرفه اهلال...