بچينالك ..

بچينالك دمع ما نازل كَبل من عين

دمع جاب الرموش اوياه .. خيمة حزن ع الخدّين

بچينالك رفيف الروح .. بچينالك عطش نهرين

طفه شمع / الشريعه / ابروح المودعين

واتهدّل عليك الكَصب شكَ زيجين

و / اغنيده / ..

كَصايبهه عله الطوفه

تفيي الشمس للحلوات والحلوين ../

نكَاط

الكحل

مشحوف ..،

مامش جرف يمعبرين ..؟

هذا الموت نزهه ابطيف حلمانين

واليحظن شمس بالنوم ، اصابيعه تِجمْر الطين

يل كلّك حياه بالموت بحزامك تشد عمرين

والطايح

تعلّكَ طوكَ فضه ابقفلة الشبّاچ  بالحضرَه ،

واخيوط البخور اخضيرة امعرسين

مامش موت ..

ها / يكَويعه حدر العين تتونسين / ..؟

....،

موتك..

سر مفاتيح العمر ../

ما رهمن  ولا رهمن ..،

مقفول الفرح ، لا قفل .. لا قفلين ..!.

ولو حزنك ثجيل إو ما يجي ابميزان ..

ثكَل ايشان / كل ذرّة اتراب اتغامز الهه اسنين

ولو حزنك ثجيل اكثر ..

نشيله ابكل كَلب حبّاك../

لعب ازغار ع المتنين .

موتك كَعّد / اصويحب / خياله امغرّكَ الجرفين

ما مش موت ..

/ كَمريه او زبونك طيف طرّز نومة الغافين /

واتعدّت / سفن غيلان ازيرج /  مايهه اشراعين

تتلكَاك ..

و / الهدّام / رَد صوبين

كل هلهوله تتعده رصاص ابغفوة ابساتين

ما مش موت ..

هذا انعاس متخوصر حدر جفنين

واليعبر صحو بالنوم ، بالنوم الصحو حلمين .

مامش موت .. بس فركَاك

يا أول نبع ..

شفنَه الرازقي ابفركَاك طكَ دفله

ممحلَه ..

ممحله اهوايه خلهه اتظل ممحله

نهرك ..

ما نشف مايه .. السمه والكَاع تمطرلَه ...