نظمت اللجنة المركزية للحزب الشيوعي العراقي في مناسبة الذكرى الـ 89 لتأسيس الحزب، يوم الجمعة الماضي، مهرجانا شعريا على قاعة منتدى بيتنا الثقافي في العاصمة بغداد.
ووسط حضور حاشد، غصّت به أرجاء القاعة، رحّب عريفا الحفل الشاعرة حذام يوسف والاعلامي ماجد رهك بالحاضرين، شاكريْن حضورهم من اجل الاحتفال بعيد الحزب.
وبدأ الحفل بعزف النشيد الوطني العراقي، تلاه الوقوف دقيقة صمت، حدادا على أرواح شهداء الحزب والحركة الوطنية والعراق.
ثم ألقى عضو المكتب السياسي للحزب الرفيق فاروق فياض، كلمةً رحّب فيها بالشعراء الشعبيين، شاكرا حرصهم على المشاركة في الأمسية.
وتغنى 12 شاعرا شعبيا بقصائدهم الجميلة بنضالات الشيوعيين العراقيين في مواجهة الدكتاتورية، وفي الدفاع عن مصالح العراقيين على طوال 89 عاما من عمره المجيد.
************************
اعادة صلة
طارق حسين
في مناسبة وضع حجر الأساس لبيت الحزب
أدخل..
لا إتظل بالباب
البيت بيتك وأنته بي تنهاب
أدخل ياهوى الخمسين والستين والسبعين
بعدك شاب
ومن حيلك نمد إجسور للغياب
فهد من دگ أساس البيت
راد البيت يجمعنه
واحنه بغير هذا البيت
مامش بيت يوسعنه
بخت هذا بخت ينرادله إمدارات
ودنيه إبلابخت مابيها كل معنى
فهد يابوي ..
بعدنه بسچتك ماشين
وبعدنه إنزامط بلينين
وبعدهه الناس تسمعنه
وإعذرنه..
لون مره انتچينه اعله الرمح
ومدينه ادينه أنصافح العفنيني
چان الليل كلش ليل
والظلمه الثجيله إتچلچل أعله العين
لچن طبع الاصايل من تگع للگاع
تگوم بحيلها وترتاب منها أسباع
فهد بويه فهد
بعدنه اعله العهد
عام وألف عام
تتلاله الاحلام
وفكرك ماخمد
بعدنه بكل مكان
نشع گمره وأمان
نطش بكل درب
فرح ترس الگب
وبعد بينه بعد
أمل عدنه وعزم
وشعب ماينهزم
رغم كل الصعاب
يظل بسمك شباب
ولا يخلف وعد
*******************************
الى الرفيق فيصل
حامد الشمري
ما بيه روح
مكان الهسّه روحك بيه
وحشه ولا شجن مر بيه
يمته ترد ؟
حنين إنت واعرفنّك
بلايه إحساس تستبرد ..
اشتاقينه لسواليفك درد كافي ..
ملّيت الوجوه البارده بتمّوز
أريدلي وجه دافي ..
على گلبك شگل للناس ؟
وصف گلبك ولا هيّن ..
ادبّرلي وصف رايد
قليله چلمة احنيّن ..
الي المرأه....
انولدتي انتي بشهر اذار
حالج حال اي ورده
جمال الورد صارخ بي احس مرات
جمالج انزك او اهده
يبس كلشي بغيابج حتى ماي العين
اجيتيني وتبدل كلشي واتنده
ربج خالقج من دفو وراحة بال
المصايب تنسي بشوفتج والشده
اليعيش وياج شاب يضل يشيب شلون ؟
نوح وكل نبي ميعمر بگده
***********************
رغم ضيم الوكت
أدهم عادل
رغم ضيم الوكت والوجع ما گلنه..
نضحك والدمع عل العين يدنه..
مقتنعين بالدنيا شيصير يصير
ما نكفر ونسأل يمتى نتهنه ؟!.
ما نكره بشر طيبين چن تنور
شما تحرگنه يطلع بس خبز منه..
ومن نعشگ عشگ نوصل لحد الموت
واحدنه إعلى ولفه عيونه ما هنه !..
بعدها هدومنه معلگيها عل الحيطان
وبعد بيبانه بكل هويه تتدنه..
وبعدها أطفالنا ترسم وجه عل الطين
وفطور السگف بالمطر تتغنه..
رغم كل هذا نبقى نغني للعشاگ
وتظل حبوبتي بكل عيد تتحنه..
أنتوا منين ؟ أحنه السمر ولد الگاع
منحب نحچي هي الناس تسألنه..
صلفين بشكل بس ويه بت البيت
خجلنه من الجدم للراس يآكلنه..
وطيبين وتحبنه الناس والمو ناس
ومرات الشمس للباب تتعنه..
***************************
هيبة زمن .. يا حزب
ريسان الخزعلي
*.. هيَ التاسعة ُوالثمانون.
الحزنُ وردٌ في العيون. والملحُ
بين الجفون.
وإنَّ التجاعيدَ إن لاحتْ
ففي وجه الصبيِّ أجملُ ما تكون..*
والصبح..
وجه الحبيبة خبز..
والناس توگف بالشعر خنجر
جبت / الجريده / حرز
وامّن رفيف الگلب.. چان اعله حرفك يفز
واشگد عاندت بيك السهر والنوم..،
طعمك مدرسه إو بالدفتر استهلال.
وإبأول نشيد اتگوم.. حتّه ابغيبتك چتال..!
يا عشگ نهر/.. يخطف اشما يعلاه..
لو مامش سمه... بالماي نلگفك سمه واهلال..1
*.. مباركٌ حينَ يلثغُ الطفل..
مبارك حين يشيخ الصبي..
غيرَ أنَّ البذارَ مودعٌ في الاجنّه.
وما كنّا مع الذاهبين الى الوليمه.
كم حفظنا الوصيةَ..؟ وما كنّا للوصايةِ
منصتين..*
يغبش الواهس درب مرسه إو حزن الگلب دفتر
واقراك: لليمشي شمس.. للناس، والوحشه
التجي..، والبيت لو ليلة مطر.
أقراك: خطك سومري ابلوحي
وايدور الحلم وجهي..،
تلعب بالنجم مهرتك.. والمدى ابروحي.
*.. عَصبٌ ناتيءٌ على كفِّ/ الرفيقِ
القديم/.
عَصبٌ على هيأة 34..،
كان طرياً.. وقد توازى مع الغيمةِ
الواطئة..!
كم تبدو السماء قريبةً من النافذة..؟!
وكم كان /قطار الموتِ/ بطيئاً..؟!
عَصبٌ نابضٌ في كفِّ /الرفيق الجديد/..
عَصبٌ على هيأة 89..،
كان صُلباً.. وقد توازى مع الغيمةِ العالية!
كم تبدو السماءُ بعيدةً خارج النافذة..؟
وكم هي الأرض واسعةٌ قربَ ساحةِ
الأندلس..؟!
الورد.. ريحه إو لون مهيوب.
إو كلاللي نحبّه.. إعله الورد محسوب
إهي هيبة زمن.. مو هيبة ذاك اليوم..،
والهيبة الچبيره /الحزب مهيوب/.
جبناها محبه.. الماعتگ بيهه العشگ للسّاع..،
عفيه اگلوب تزغر بالعمر مگلوب..!!
بس قمصانّه أيام السجن عتگت.. إو ضمينه العِتگ عطّاب للمصيوب.
كل هذا الحزن.. والفرح جاي انگول..؟!
بويّه أنتَ دگلي امنين..؟ من يا ديس راضع.. يا بطن مجيوب..؟!
هذا استشهد ابصحوة عراق إو فايض القيمه..،
والآخر عله الشطّين بالظلمه گمر مصلوب.
والعدلين..؟
العدلين باب.. إو /فهد/ ليهسه سماه امشرّعه البوب..!
إو ذرعانك مشاعل /يا سلام/ ابساعة التحرير..،
ويّه /اجواد/ كلّك بالنصب مصبوب.
*.. كلّما يضيقُ بيَ المستقرُ الأخير..
أرنو الى الأذرع المقطوعةِ
في ساحة الأندلس
وأكتبُ النشيدَ عناداً..*
شتلناهه المعزّه ابغمگ دمع العين..ّ
واتراكض خضارك كل غصن بستان..،
والهايم يترْس اعيوب..!
مجنونه المعزّه.. اشيلحگ اليكره..،
يسولف ويّه روحه ايگول أحبّه..،
إو كافي عمري اذنوب..!
بالغيبه او همسنه اصياح..،
يتلوّن عله الحيطان.. يا/ لاعب ولا ملعوب/
والشارع كبر طوله.. تحضنه اللافته الحمره..،
وأغانينه يصفگلهه الطفل والشايب المتعوب..!
لو ضيعت طولك.. أنفضح بالروح
يا روح التضمّك وانت بالطوفان بأول لوح مكتوب..!
والگاع الوسيعه ابغير وزنك ما صفت گاع..،
چا خفّت ابساع إو ثگل خيط الثوب..!
صَمْ /سِمْسم/ يلمّك چف.. بس يملي مزارع بالنثار اشليل فوگ اشليل..،
وايلوّن اخيوط الشمس بالحالوب.
ولا لَمك زمن.. حتّه الزمن سمّوه شيوعي إو من أوّل التقويم..،
ليهسه المشاعيّه حرف من نار.. لا ممحي ولا مشطوب.
مو گتلي الزمن، ما ينعد ابساعات، لا بأيام، لا بسنين، ينعد من تشم أرواح.
أشم أرواح..؟!
- هاي الريحه شهگة گصب يا /خالد/..، شهگة هيل يا /يا وضّاح/ يا أول(سريع/ الفات، يا /ستار/ يا /محمود/ يا /أبو العيس/ يا /زكي/ الما طاح
يا آخر شهيد/ العَدِل.. شد گلبك عله الصندوگ والمفتاح.
زغير آنه إو عرفتك گبل اصابيعي..،
حسبتك.. إنت إوّلهن..
حسبتك.. إنت عاشرهن..،
گبل درس المعلم بالدرس محسوب..!
والفرگه..؟
الفرگه عبرناهه رسايل بالحلم، والذاكره الرّگص
هچع.. بالغيبه عيب اتّوب.
ليهسه وتر بالكون../ ينده غفوة التاريخ..،
واليسمع عزفنه ايلوب مدري ايذوب..!
ما يدري الورد بالعمر.. رحه إو لون مهيوب
إو كل اللي نحبه إعله الورد محسوب
و /الهيبه الچبيره/.. الحزب.. يا ماي الوطن.. مهيوب.
ما مش للمحبه عُمر.. ما مش بالمحبه اذنوب...
أعرف امرأةً في التسعين
كانت ترددُ قبل وفاتها بيومين
*.. سوّلك نهر يهواي وابصف نهرنه
كل العشگ مستور واحنه
اشتهرنه!