تتراكض احلامك
والزغار ابدربك المضوي
وترد للبارحه امعاند صلافة ليل
عين الليل وكحه وماتردهه اعيون
وحدك .. هاكثر سهران !!!
وحدك
بالنده الحزنان
واحلامك اتعاند بيك
ياحلم اليلم الناس
واتوديك روحك للبعيد اهناك...
للشجره الزغيره بباب المعظم
الكبرت واعتلت
واعروكهه اتسلم عليهه الشمس كلهه
ابجرف ( خضر الياس)
تتوسل اشموعه التبعد الوهواس
حقك .. لو بجيت ابدمع كل الناس
حقك لو بجيت ابوحشتك
لن السهر ملعون
من اول عمر ...لليوم
طاير نومك امن النوم
يانوم اليردلك بعد
ويظل ابحلاة الخدر نوم
ابكل ليالي النوم
واتردك صفنتك للمناره
البيهه كل اهمومك التصعد للهلال
وتصير اوذان ..
صبرك ثكل حيل وبعد يتنخاك
من صورة ( يسوع) لختمة القرأن .