1 - اعماق
من عيونك
شفت روحك نبيله
وروحي تغار
من مهره اصيله
مو كحله
الجمال البيها يظهرها
كحيله
لا عاشگ
ولا محسوب
ع العشاگ
مدري شبيها
ماتغفاش ليله
روحي
وتضطرب
ويبان
سرها المخفي
بالاعماق
ما بيديها حيله!
2 - فد نوب
مامتغيره بالمرّه
السنين العاشت
بفيْها
بعد خضره
نفس هاي السنين
اشتعلت بروحي
وطفتني
ونفس هاي العيون
الچانت تحبني
نستني !
ما متغيره
فد نوب!
3 - شعور
الشعور
بعده
واعتاد
التوهج والتموج
والعمق
كل يوم تسريحه
القديم يبيِّن
من اللمس
والريحه!
4 - الولادة
كلمه وحده
چان تشكيل العباره
وبزمن لاشي
حدث بيها انفجار
وبزمن ما ينحسب
غطت الناس السُحب
والسحب مطرت كتب
مسرحيات وروايات
وشعر والقصص
جدا زغيره
تزغر
وتستمر تزغر
حتى ترجع
كلمه وحده!
5 - مُستلَب
إمشي
مثل ما يمشون
لو عبروا رصيف
اعبر وياهم
وصير الهم رصيف
خل يدوسونك
حياتك شنهو بيها
ورقه صفره
كل عمرها تريد
يحضنها خريف
شنهي انت
شفره بالشريان
من ينبض
تسد باب النزيف!