لمعت بعينك حنطتي ورد جوعك يگود ايدك
وادري بهلالك منجلك وي سنبلي ايهل عيدك
ثاريك گرصة عگربه أولها لدغه وتنتهي
بس تالي سمك يطلع
وصوابي مو خيمة بدو شما تنفتگ تترگع
عندي الجرح مو اي جرح ما اقيسه بالشگ والدم
عندي الجرح بس اليخليني اندم
واتندمت .....چنت اضحك لعينك وفر
بس أنه انامن محروگ
ونيت حد ما كزبرت جلد النوگ
مابشرت روحي بندى وتفرهد اسنيني اعثوگ
و لفة چماغ بثار الك گلبي التف
وجروحي مغرب وبگبر وعيون أم شتنشف ؟
خيط الوصل من ينگطع ينذب مثل خيط الحف
مصيود من غيري ورحت
وانه الصگر لو صيدي لو ماريده
بلا منه لبنادم بعد كلمن يعيرني بعطى مالاته احطهن بيده
كافي بعد الليل اخذ مني عمر
من باچر ابدي من الصفر والميل اچتفه من العصر
ما احن حتى لو تحن خيال وبچفي الرمح واتبختر
مصلوبلك وگفة شمس. بس انت كاعك تفتر
صبيتلك شوفي مّزن وانت بلواهيب الحر
چا عيِن روحك يالشلب عودك خلافي تكسر
جروح البشر تتداوه بخيوط وابر
بس چان جرحي بضحكتك يتخيط
وهساعه اذا عندي جرح امكابري غيمه ملح
هيس اللچمه ونگط
وانه تعرفني بلا سرج
اركبها والريسزز عشگ دوم اوصل اول للخط
واتعمدت ارجع لأن ادري ب مهرتك تفحط
صابر واشد جرحي بجرح
ولا زاجل الجايب عذر فوك الگلب حام وحط
وانه العليك بكل نشد تعبت متن الساعي
مادام نشفت گصتك المن يهفي اشراعي
باچت مساحييك بعد ما الك رده لكاعي
انغشيت يا ماي الذهب
وانا لصفارك من لمع غيرت كل اطباعي
ورديت خالي من الربح
. لا بيه حيل اوصل هلي ولا سالم على امتاعي