اخر الاخبار

عيش صخره  ابلايه  واهس

اطوي  صفحات  الامس طوي  الجريده

واخلع  اهمومك  مثل خلع  المحابس

كاسر  ابكاس الأحلام وصلي بالضحكه فريضه

وعيش  جمره  ابجفن  ناعس

حته  اگلَّك....

ليش عاشرت  الغراب وبالحزن  ظلّيت  سايس

ليش ماتعشگ  شواطي ايظل مضيفك للنوارس

عيش صخره  وناغي صبرك

وشرب  السكته  نعاوي

لوشفت  دمعك عله  الراحو  يبور

وعيش  عطرك

لايظل حالك  مثل  عود  البخور

الچان  خطار  العرايس  هسه خطار  الگبور

وعيش  صخره  بمتن  چالي

وموش  ريشه  بحلك  ريح

ولاتطيح   .....

ولاتصيح   .....

وضحك  ابوجه  الهوه  اعله  اعناد  جرحك

عيش  صَبخَه  وخاوي  ملحك

ماني  شفت  اجروح  گبلك

تشبگ  اللّچمه  ابملحهه  وتستريح

وعيش  ثوره  اعله الضمير 

اتعيش راس..... وغير  ربك  لاتطيع

وصير  نقطه  اعله  اليمين

وحته  مايحسبونك  رقم  ضمن  القطيع

عيش   بس  مثل  الاشجار

اليبست  ابحضن  الخريف

وماشِكَت  بس  للربيع

تعيش  سكته

تموت  سكته

وتفتر  بحلگ  المواسم  ماتضيع

ولاتصير  بغصن  ورگه

الغصن .... بس  تيبس  يبيع

وعيش ضحكه   ابطن  حوت

وخلّي  جرحك  دم  زفاف

ينزف  ابهيبة  شرف والشرف صوت

وخلي  صبرك.... عرج  توت

ايعيش  صيت  ولا يموت

اشكبر  بخته...اليشتل  الواهس  احديثه

اشكبر  خلگه....اليزرع  ادموعه  ابتسامه

ويسحگ  اجروحه  ويفوت

وعيش  يومك

عيش نحلة  ابنص  خمايل

لا تساوم  ع الجناح

ولا تخيط  العين  بدروب  الرسايل

چم  فجر  چوّه  الظنون

وچم  درب  ع العين  عايل ....!

تِصِح  چلمه .... ايورّد  ابفَيها  الحِماد

وتِصِح  چلمه... التاكل  ابروحك  رماد

وخلي  روحك  گاع  خضره

اشما  گصت  بيك  المناجل  

ونته  كيفك  ...

هذا  درب  الصبح  چوبي

وذاك  درب  الليل  نايل

ونته  كيفك ...

عرض مقالات: