زلمنه ابثورة العشرين
حلفت عالمنيه اتفوت
تتسابگ مهابه٠٠٠
او تضحك اعله الموت
صار الموت ميت والزلم تابوت
صاحوا صوت واحد
وابعزيز الصوت
الغاصب فنه الغاصب
گأعي ايطب ليها
تتفجر حدر جدمه لهيب او نار
وابتشرين هيج انتفضت الاحرار
شباب او يا شباب اتگول چن ازهار
ابعمر الورد هبوا بالعزم ثوار
أحفاده ابزود أحفاده
جدنه الهوس بالعشرين
غنوا للوطن غنوة غوه ابتشرين
أزاد او عمر حسين
ابهيه اويه ماري
نرجس او شيرين
ذوله احفاد ذاك الگال ؛
من لحم الصوجر خلينه
شبعان او تريع واوينه
من گاع الرميثه
الساحة التحرير
الثائر نفسه او نفس الرايه
زلم للموت عنايه
بأرواحهم دون الوطن
هبوا سوه
كاوه او حمد
ستار٠٠ سعدون او فهد
جرح اصويحب ثار او غنه
هزيته الموت او ما هزنه
بينه او منه
سور الوطن عالي يظل
مهيوبه چلمات الأهل
رغم الحلم مذبوح
وايون ابزعل
بس بالافق ومضة امل
اتهل او برد عالي الوطن
لأهله الصدگ
مهيوبه والمطبگ يدگ
و اصيع يطگ
ايغني وفه داخل حسن
وي حسن زيرك للوطن
ابكل صدق
وابكل دلال
( هربجي ٠٠ هربجي
كرد او عرب رمز النضال)