إلى روح الراحل كوكب حمزه
بعيدة الگنطره والسچه وحشة خوف
غُبره والدرب عاثور
سنطه ...
وصوت ناعي ايفزّز الميتين
مسموع الونين وياخذ الحيل
رُبابة گاولي وصوت الحزن مبحوح
وسچين النواعي ايمرعد الروح
يا طور الحزن ( مسموعة ونت الليل )
ويا بخيت ايزتني يم ديرة هلى
( عيني يا عيني يا هوى الناس
، قداح وشموس وعصافير
، يا ليل ومعاشر نواطير )
ها ( يكوكب ) وين راح الغنه وعيون السهارى
وكاس متعب
ايهيّد الناي الجروح
ابشفة امعرسين مات الفرح يا (كوكب) بعيد
( همه ثلاثه للمدارس يروحون )
عافوها المدارس بسطوا چنبر رصيف
عيشه مره
الدنيه مره
(بترفك لايت) يِّجدي
والوطن مسرح الغُربه
والوطن ياكل ابولده
ويحضن ايناغي الغريب
والنواطير بمخالب لزموا الصوبين يا كوكب ( حريمه)
مو خناجر بيدهم سيف وطبر
غربه يا ديرة هلي
تراب يا ديرة هلي
شبيك يا ماي العروس
شبيك يا چوبي الفرح
امغيسل وگافور يا ديرة هلي
( بچي الشموع الروح يا كوكب
بس، دمع ما مش صوت )
والمنافي تحز وريد الحنظل اتشربَك عسل
والمنافي غصه غصه
وچنطه چنطه
تشيل يا چنطة وتصعد يا قطار
(صار العمر محطات
، كالولي كل الليل يلتم ما يطفيّك
وكالولي كلكّ حيل والهّم ما يمضّ بيك)
اشتاكيتها الديرة هَلَك؟
اتسافر الديرة هَلَك؟
والطيور الطايره ...
تجيب وتودي السلام
من چحيل الغربة تحملك سلام
ردني للمضيف وچاغ دَلتنه
( رديلي الفرح رديت)
وين رايح...
والنجم يمشي وراك
وين رايح...
كل بساتين البنفسج تعطش وتذبل تموت
وأنت شوگگ بالعراق
( والعراق بعينك الحلوه ينام
لو رديت يا كوكب
تبوسن يا درب تصرخ على يا باب )
نام ابغربتك واغسل سراب احلام
العراق ابلا عراق شگد رسمنه اوهام
صحينه عل البواچي وعل الهضيمه انام
نام ابغربتك شتسوي بالرجعه