اشلون المك..
ياطبع زيبگ صعب بالايد صمك
تلصف بعين الشمس..
ليرة الفضه ..
بشفه غضه..
يبان لو تضحك ترافه،
بطرف سنك..
لضم ليلو امطرز برصعة ذهب..
والشمره ماخذها ابتسامه ابحلگ امك...
خايب العالي بوگفتك
ارد انوش عثوگ قداح الگصيبه..ومنها اشمك...
فرفحت روحي عطش..
واخيالك يغطي وگفتي
بظل شمس..
واعطش يراودني طيفك چن نهر عطشان مثلي..
اضفافه مثل اشفافك الذبلان بيهن طيف بوسه...
وصارت الحسبات هوسه التاخذك مني...واحس كل لمسه منك..
جوري طگ ب ضحكتك..
توني ارتويت..
وارتوى القداح من فاض النهر ترس النهر روجة عطر...
طشت النسمه بسماي
مطرت الدنية سوالف
على العطر فاض بگذلتك..
والگصيبه الطايره تنوش الشمس
يلي طولك سيسبان وعالي مثل النخله جمارك حبيبي..