بمناسبة ١٤ شباط.. يوم الشهيد الشيوعي
دم الشهيد انرسم
أبروض السمه سنبله
طرز أخدود العشگ
جوري او وفه
او يا هله
بيه الوطن للنجم
ابكل الاباء اعتله
شايل فخر يا فخر
أعظم و أجل منزله
كل گطره منه علم
تتباهه بيه الأمم
ابشوگ صارت اله
أجمل سفينه الگاع
صار الهه بالمرجله
أقدس او أحله اشراع
ابزند الزمان انشد گمر
او للوفه صار إشعاع
دم حازم ٠٠٠!
او صارم فلك
بيه دم فهد مصراع
طرز الدنيه غوه
دم الوفه ما ضاع
للزمن صار أغنيه
ترفه المجد تلحين
احروفه ابطريق الحلم
طگت عشگ و ابساتين
ازهار من كل شكل
جوري او بنفسج كتر
والرازقي كترين
دم موناليزا او سحر
حنة غوه او چفين
ابدنبه الامل خط درب
يتباهه كل زين
درب النضال الأبي
امطرز عشگ طيبين
اوسام اعله صدر الفخر
دم الشهيد حسين
غناه الريل او حمد
غناوة امحبين
نجمه ابسماء المجد
شالته ابيوت الطين
شيمة صرايف هلي
رغم التعب حلوين
طيبه او كرامه اوهله
حب او درب مرجله
دم الشهيد انشتل
ابليل العشگ سنبله
يطرز أخدود الوفه
كل حين كل مرحله
طيب أيتناثر عشگ
غنت مرابع هله
اهلال عيد الخلگ
دم الشهيد او نثر
للناس فرحة هله
اكليل أعله راس الزمن
اتلاله بيه او حله
ابتشرين چان آخره
او من دم فهد أوله
الچاكوج بزنود الزلم
بيرغ يرف مرجله
و المنجل ابشيمة حمد
خضر عشگ سنبله
من دم الشهيد انسگت
والشوگ بيهه نزف
شوگ الغريب الهله
شوگ الغريب الهله