مهداة للرفيق الراحل المناضل حميد مجيد موسى السكرتير السابق للجنة المركزية للحزب الشيوعي العراقي
حمد...
يبن الليالي السود
الطلگَن...
چابن الغُبشه
حمد عگد (البيات) أيفوح
من عطر الوطن رشَه
بصفوف الوطن أول
وهويته چانت المنچـَل....
يزرع رازقي وقداح
ويّباري بالكلب هرشه
أبيمينه هيبة الچاكوچ
يدگ التخت للعريس...
وللظالم...
نجر نعشه
حمد....
مينام ليل الضيم
ويكرّم للوطن فرشه
حمد...
لا دنگ ولا ذل...
ولا گال الدرب وحشه
يحب الناس وتحبه...
وبگلوب الشعب عرشَه
بيه سايه حَمد....
والسايه ظلت بيه
شما يگبر حمد....
بيه تكبر اللولـَه
حب الطيب....
حب الخير..
حب الناس...
وحُب الوطن بيه سوله
حمد جرحه چبير...
أچبيييير....
على طول الوطن طوله
من تُغفه الشمس (حمدان)
يحط أبگلبه مگواره
(عين الذيب عيب أتنام)
يظل الحارس الجاره
عينه عالسلـف لوجاع
يوگـِّل زنده خطاره..
حمد محله السوالف...
تضحك أبحلگه
لا سده المضيفه ولاطفت ناره
حمد ثارات أله أشگابين
ويسامِح ما طلب ثاره
ديوانه بخيت ويحشِم الزاره
حمد حب الوطن
حد العَظُم عشگَه
وگلبَه للوطن شده
أشگد حب الوطن...
حبه
وسلّملَه الوطن رايه
وبيده شايل الورده
طش الورد فوك الراس
وعلك رايته بخده
ــــــــــــــــ
*عگد البيات : زقاق بمحلة الوردية محافظة بابل ولد فيه الرفيق حميد مجيد
*(عين الذيب عيب تنام) بيت من قصيدة للرمز العراقي مظفر النواب