گمر دم الشهيد
انرسم فوگ الگاع
طگ وي الثريه إشعاع
خضر دم فهد فرحه
طگ نجمه ابسمه الوادم
او محنه او حب نزف صارم
رسم گاع العراق اشموع
فوگ المشنقه حازم
دمهم طيب حلو اطباع
لاوه الموت ساع ابساع
مزنة خير
من صدر السمه الگاع
دم اشباط
خفگت رايته ابتشرين
هيل او رازقي او نعناع
عزف ترنيمه للثوار
أسمهم للمسيره اشراع
ساحة التحرير
صارت للفخر ميدان
من عادل سلام
الحيدر القبطان
والحبوبي لوحة عز
عرين اسباع
شباب أبعمر ٠٠ عمر الشوگ
اهلهه او تشهد الأيام
والتاريخ صله ابحب
لاسمهم طاع
نشامه او لوو خشم الموت
والموت ابكرامه انصاع
كرامه المونليزا
او دم خالد رسم
للعابرين اشعاع
رسمو للاملاكه اچفوف
ما رسموا چفوف اوداع
عثمان او حسن وازاد
عدهم خوش ٠٠
خوش أطباع
دمهم جسر فوگ الموت
شوگ او للنصر صناع
على أركانه ٠٠٠
كتبوا بالوفه تاريخ
غالي الوطن ما ينباع
غالي الثمن چان أرواح
تسامت الشهاده
او للوطن فديه
أشحلاة الموت عدهم؟
سوالف والوطن بس كون تزهي أيامه حريه
شدوا على أزمور المنايه
اگلوب حربيه
تساموا بالرمادي
او لبت البصره
نده صوت الكرامه
ابنگرة السلمان
ثوره اتفجرت ثوره
من ابو چون الرميثه
اوغيرته او قدره
من هور الچبايش
غرد المشحوف
للموصل تعده أو طاف
نرجس رددت عقره
عتابه او شوگ ينگل شوگ
أبوذيه ابلحن داخل
غنت الشطره
وي دم الحسين٠٠٠
ابكربله الثوره
فزع حس الوطن
مهيوب من بدره
صار الوطن شعلة شوگ
ثوره أو ثائر او ثوره
دم اشباط وي تشرين
روه الگاع
طگ بيهه زئير اسباع
ابصده هلهولة علاهن
خضر النعناع
عمر سعدون٠٠٠٠٠
بيه يتباهه بأبن ثنوه
دمهم طبع فوگ الگأع
تسيورة وفه او نشوه
غنه الجبل دبكه
أو جاوبت ذي قار
هيوه وأصبحت سلوه
ابنده الشلال غنه الهور
چوبي او صفگ الناعور
طلقه ورقة البلوط
والبردي فزع شاجور
من اقصه الأقاصي
او فوگ
هتف كل العراق
او صافيه النيه
احنه السيف احنه
و الخايف طبع برديه
طوعنه الخوف او غنبنه
الخايف ما يصنع حريه