قصيدة “إلى شهيد” التي كتبها الشاعر الراحل  كامل العامري عن الشهيد محمد الخضري الذي اغتيل على أيدي جلاوزة البعث الفاشي يوم 22 /3 /1970 ووجدت جثته بالقرب من مدينة “بلد” وقد اخترقتها أكثر من أربعين اطلاقة. يقول فيها:

(إليك يامن سافرتَ بلا شكوى .. لقد كنتَ بيننا.. وستبقى حتى نمدّ لك أشرعة النصر.. لتحيا من جديد)

بجينه وما بجينه عليك

ياجلمة بحلك تاريخ

دكت فوك وجنات الزمان بدور

بجينه بدم...سرج مهره..

كبل ما ياخذ بثاره ويبشر أور

بجينه شنعتذر لو عاتبت بابل..

بجينه شنعتذر لو عاتبت آشور

بجينه...

وما بجينه عليك...

ندريبك عدل والموت ..بيك الموت..وأنته الموت

فنه الموت يمحمد عليك يفوت

يالخطيت بجروحك درب ثوار

يالشكيت من هام السمه للكاع سجة نار

يمحمد...

حمامات السجن يتنشدن ظلن

يمحمد..كطايات الشلب حنن

دكلي شنعتذر للماي واطراف السعف والهور لو عتبن

يمحمد بيارغنه وضحايانه..

تمد فوك الحياة جسور

موش احنه شمس

وافكارنه بدرب الكواين والزمان اتنور

موش احنه حلم ريان

ويرفرف على جفون الصبح راية

موش احنه نبع ..

يطلك على دموع الحزن مايه

موش احنه شتلنه ارواحنه ابهذا الدرب ثاية

ما نبجي على ذاك الفاج ماي الموت

واتعنه الوفة وما ذلن ايامه

ما نبجي على ذاك الفارس الما عثرن اجدامه

ما نبجيك..هنيالك والف هنيال..

كلمن شال زاد العمر بجفوفه

ما نبجيك هنيالك والف هنيال ...كل خيّال ..

ما هد الرسن مرة وطفح خوفه

ما نبجيك..لو ندري البواجي تفيد

ما خلينه من ماي الدمع كطرة

ما نبجيك.. لو دمع البواجي يفيد

جا فاض الفرات و(حسن) ردّ عمره

وجا ظلت ازغار كبار..

بلجن يرجع حسين وجمال وعادل وجبار

وجا دجلة بكت تنحب...

ثلث توكات...يوم بيوم

بلجن يرد من تنحب عمر (ستار)

ندريبك خذت صوغة ورحت طارش

تودي اخبارنه لحازم

تودي اخبارنه لصارم

ولكلمن شتل كلبه وطرش كبلك

تودي اخبارنه الكلمن

بهذا الدرب حط رجله

يا نفحة ورد نيسان..

يا شيلة الراس وهيبة الديوان

فهد يتنطرك يمحمد ويتنطر أخبارك

دكله احنه

هذوله احنه

بعدنه احنه

ترف راياتنه ونمشي بضوه افكارك

يمحمد دكله احنه

هذوله احنه

زلم خشنين تدرينه

نرش اجروحنه بماي وملح

ما يوم ذلينه

نفك ليل الحزن بالدم ..ولا نهتم..

يشامت روح دوّر

كل تواريخ النضال وشوف أسامينه

يشامت فوگ هامات النجم والغيم تلگينه

يشامت روح وانشد ثورة أكتوبر

وانشد كل كتر بالصين

وانشد صوفيا وبرلين

وانشد سچة الغابات

تلگه بكل شبر منها يشع فوگ العشب دمنه

حبال الصلب تتباهه گَلايد فوگ ركبتنه

يشامت روح وانشــد عالجسر تذكار وثبتنه

هذوله احنه

بعدنه احنه

خضيري الهور يتغنه بسوالفنه

 

ومدّ الماي بينه يفيض لو رفت شفايفنه

وحگ بيرغ حزبنه ... وهامة الطيبين..

تشهد بينه من ذاك الوكت لليوم دنيتنه

أبد ما ردت اجدام العزم بينه

ولا خفتت مواگدنه

وهاي الشمس تضوي بنور چلمتنه

بگول وفعل ذوله أحنه...

تشبه صفة الفالات صفتنه

يمحمد شوصفك والوصف يكصر

ومهر الصوت يمحمد...

على اشفاف الدهر يعثر

يمحمد شوصف بيك

وانته على الوصف تكبر

يالعمرك نبع تاريخ

ولد الولد لو مرت يفيض الزود بيك أكثر

يالمديت روحك للفجر معبر

يمحمد بجينه وما بجينه عليك

يا شمعة عرس يالدمك زواكه

يمحمد بجينه بجفن الموادع

وكل احنه على هذه الدرب نتلاكه

يمحمد يريت أردود

لينه تعود

واشمّن كل كتر..بيه نامن جروحك واشمنك

واشهك حيل ... حيل الحيل

ريت انه والف يا ريت

عيني توجد اجدامك واتبعنك..