مهداة للشاعر الصديق.. مظفر النواب

القيت في المهرجان الأول.. لتكريم الشاعر مظفر النواب

بيا ... مشاعر أكتب الجيتك.. غزل!!

إبيا .. أماني .. إبيا وجه اگاگ..!!

وّرسملك .. قُبل..!!

آنه من رغبة (اصويحب).. بيه صوت..

الموت .. ممهور إعله بابه..  وبي قِبل..!!

أحنه صاحبنه الزمن.. صحبة صديق..!!

والزمن صاحبنه.. بس .. بينه خِذل..

ومن هدل زيج الزمن..!! صرناله خيط!!

بس.!!

رفض ينزر.. وظل زيجه هَدَل..!!

أحنه عِشرة ملح للوادم نصير..!!

أحنه مملوحين بالحب.. بالحچي.. وّهم بالزعل

أحنه.. بيت العافيه.. وبيت الفقير!!

وبيتت خُبزه لكل بشر.. چفنه انشتل..!!

روحي.. صارتلك محبه.. بلايه خوف..

والحچي المايل تره.. بيك إنعدل..!!

مره أحيا وياك.. ومره اموت!!

ومره روحي إتصير نهر من الخجل..!!

أگعد إبحيرة عذابي أغسل هواك..!!

والعراق ابطولك إمگدر نِخل..

ولِّونت!!

طيفك حِلم باقي إبهواك..!!

وحاشه جدمك ما عرف مره الزلل

صبرك..

بحّلمي مراجيح الحياة..!!

ومن..

صبرنه اتعلم ابصبره الجَمَل..!!

انته.. لَونت العُمر بَسمْة ربيع..!!

وّطفت بعيوني جداول من عَسل..!!

يا گرنفل..

يا ورد كل الحياة..!!

والگرنفل من هواك إشگد حِمل..!!

هاك..

إخذني وياك باب.. وأنته ريح..!!

وهاك إخذني لدفتر أيامك جُمل..!!

آنه غنيت لّهوانه بكل زمان..

مثل.. ما غنيت إنته.. إوّ بعد أظل

واظل .. مخنوگ إبعبرتي.. بلايه صوت..

مُغرم إبحب العراق من الازل..!!

إندار. .

وجه الزمن.. ونته.. شما تدور..!!

عالي گدرك.. ونته أعله من الجبل..

أنته..

صم إتراب من هاذه العراق..!!

بيك .. طبع الحزب وربات الاهل..

يا بو..

دفتر بافره بأَول شِتاك..!!

چم شته المرَگ ومن عندك خجل..

أوراق عمرك بيهه أشم لون العراق..

يلي حزنك صار مدرسة الزجل

آنه ادري الليل ضَيَعْ سِر هواك

وادري سرك ذاك .. وي ليله إنقفل..!!

يل عزيز .. وشاربك تبقه العزيز..!!

وشاربك.. تبقه تظل مهما حِصل

اسمك مظفر.. تظل مهما حصل..

ـــــــــــــــــــــــــــــــــــ

نشرت في جريدة الشعر الشعبي – العدد الرابع – تموز 2002