هاج البحر ...
وانحبست الحسره بالجفون
اذا اقرب الناس ايريد موتك
عليش اتهل دمعتك عاليموتون
اليموت ابهلوكت يرتاح ويهيد
مو مثل اليعيش ابديرة اغراب
اهنا لما انموت الثلج ينهال
اهناك ادموع اهلنه اتهيل التراب
من گاعد ویاهم انته مجنون
من اتموت اتصیر اشكثر حباب
يتمنون ترجع من بعد موت
ما ضاگوا الظلمه وثگل التراب
چنت بیناتهم بس ما یشوفون
ظیمك والوكت وفراگ الاحباب
ولا واحد نخیته وگال عیناك
ولا صاحب وفي الينشد عن الحال
وحدك تصفگ ابراحك على الراح
لان وكتك ترده والحمل مال
طبع دنيه اتعلي العنده جنحان
وايضل مكفخه الما يگدر ایطیر
واذا فد یوم طحت ابزلة السان
يگطعونك وصل مثل المناشير
واذا وكتك عكس وياك فد يوم
اعز الناس عندك ضدك ايصير
بس خليك دافي ابثلج الايام
وخل طبعك يضل طبع النواعير
اشكثر شفنه على طول الوكت لچمات
وكتبنه لسان لحلوگ التنانیر
الخبز من یستوي ابنيران الافكار
يورد طيب بگلوب المحبین
الخبز نفسه ولا بدلنه تنور
لان الطیبه من طیب العناوین