بغداد ماتنطفي ...

ولا صوتها إيموت

مثل الهوه ..

إبكل حيّز إتفوت

مثل الشموس التضوي البيوت

مثل المحبه ...

تنبت إبكل گلب بسكوت

مثل الشمع ..

تبچي بلا صوت

بيها الگهاوي ..

والمضايف والفناجين

بيها العشگ سولة مجانين

بيها إنكتب ..

أوّل حرف بالبردي والطين

بيها النخل والشعر والليل سهران

بيها الحصيري يمشي سكران

بيها الچفافي أشكال وألوان

بيها أبو گاطع ..

للصراحه صار عنوان

إبكل بيت من چلماته نيشان

بيها القصايد ..

والأغاني والمواويل

بيها الضوه وبيها الشناشيل

بيها ( النواسي ) ..

رافع الكاس

بغداد أبد ما طخت الراس

وما حسبت فد يوم تنداس

من يگدر ...؟

إبغدادنا إيعيل

بس الورد والهيل والياس