يوم الواحد من تشرين
والصار بخمسة وعشرين
ما ننساها تمر سنين
لذاك الدم نريد الثار
يوم الواحد من تشرين
............
شعب وشال شگد هموم
يحرگ لو صاح المظلوم
ماظل عدكم شي مضموم
ما تنفع صبه وإنذار
كلنه عليكم متوحدين
يوم الواحد من تشرين
......
باچر نهتف بالساحات
حي شعبي وبعده مامات
ماظن فرصة الكم هيهات
بعد السويتوه والصار
تختل تشرد گلي منين
يوم الواحد من تشرين
..........
ماشايف مجلس بالختله
يگعد و يصوت يافشله
شظنك شعب اليغضب سهله
اله يخليكم طشار
يصبر يوم وموش سنين
يوم الواحد من تشرين
..........
واحدكم اكبر دجال
وتكرهكم حتى الاطفال
بيكم مايتغير حال
خونه ودجاله واشرار
وتبوگون بأسم الدين
يوم الواحد من تشرين
.........
باچر نطلع نتحداكم
النه حساب هواي وياكم
ع السويتوه ماننساكم
ما نقبل ذله احنه احرار
همتنا تشد وما تلين
يوم الواحد من تشرين