قصائد وأغاني انتفاضة تشرين .. ألهبت الحماس وأعلنت رسائل الاحتجاج

أعادت انتفاضة تشرين للشعر العراقي بشقيه ـ الشعبي والفصيح ـ حضوره بين الناس من جديد. “إنها الثورة الوحيدة الحديثة التي يتقدم فيها الشعراء الشباب، والمثقفين الشباب الصفوف الأولى”، هكذا وصف الشاعر الفلسطيني فخري رطروط، ثورة تشرين الأول/أكتوبر العراقية، إذ إن معظم الشعراء الشباب هم اليوم في الواجهة، فمنهم من يسعف الجرحى ومنهم من يقدم الدعم اللوجستي، ومنهم من يوثق أحداث الثورة ويتلقى الرصاص في صدره، فضلًا عن كتابة القصائد التي سوف تخلّد مع خلود هذه الثورة.

يقول الشعراء إن انتفاضة تشرين الأول/أكتوبر أعادت للشعر العراقي بشقيه ـ الشعبي والفصيح ـ حضوره من جديد، بعد أن كان أسيرًا في غرف الأيديولوجيات الدينية والسياسية، وبذلك برزت عدة مصطلحات تسخر من الشعر والشعراء، مثل “شعراء السلطة” و”إساكفيو الشعر” حتى فقد الشعر والشعراء الحقيقيون مكانتهم في المجتمع حيث أن الخط العام للشاعر يؤشر إلى أنهم منحازون للسلطة ويعملون في مؤسساتها. لذلك أصبح الشاعر متهمًا فيما يقول ويفعل.

لكن ما إن جاءت ثورة تشرين الأول/أكتوبر عاد كل شيء إلى مكانه الحقيقي ومن بينها الشعر العراقي الذي قال فيه محمود درويش، إن “الشِّعْرَ يُولَدُ في العراقِ، فكُنْ عراقيًّا لتصبح شاعرًا يا صاحبي”، فبرزت صورة أخرى للشاعر العراقي بوصفه ثائرًا لم “يتلوّث” قلمه بمديح السلطة وما يتصل بها، بحسب الشعراء، وأصبحت ساحات الاحتجاج المنصة الحقيقية للشاعر بين الشباب المنتفض، فيما يتعرّض هذا الشاعر بالوقت نفسه إلى وسائل القمع عبر الرصاص الحي والقنابل المسيلة للدموع والصوتية، وهو ما يترجمه قول الشاعر العراقي مظفر النواب، إن “الشاعر منتميًا للجياع وللناس التي رفعت قهرها هرمًا”.

إن القصائد التي كتبت ولا تزال تُكتب عن انتفاضة تشرين لا يمكن أن يجمعها كتابٌ واحد فضلًا عن مقال، فهي من أكثر الانتفاضات في العراق التي ألهمت هذا العدد الكبير من الشعراء لكتابة قصائدهم، مؤسسةً لجيل جديد يشبه وطنه ويعيش همومه، ويكون في صف الشعب دائمًا وأبدًا متخلصًا من كل عقد الماضي والتبعات الثقافية والسياسية، مطالبًا بالحرية والعدالة الاجتماعية.

اخترنا مجموعة من القصائد التي كتبت من وحي احتجاجات تشرين الأول/أكتوبر، لشعراء من مختلف محافظات العراق:

الشاعر كاظم السعدي

هذي دارك يالعراقي واليوافيها كسب

دار ابو الحسنين حيدر هذا ابن اشرف نسب

ثور يبن الرافدين.. وبدد باليقين الشك

 نصرك ياوطنه مايجيبه الا الشعب

لاتراجع انت الاقوى وباجر احسن من امس

حقك المغصوب جيبه

الحضن بغداد الحبيبه

 وين ترحل ياخصمنا وثار بركان الغضب

والله مايغمض جفنه اتعودينه اعلى السهر

للعراق الغالي احنا انجيبله شمس وكمر

ومانرد الا بنصرنا..  احنا ماننذل عمرنا

الشاعر رياض الركابي

يمته يا وطن.. من صدگ ترتاح..

او تسد باب الارامل واليتامى

او تِلم ولدك امن ابواب السفارات

ذلّه الفيزا صارت والاقامة

افه عالصار.. بيهم.. افه ويصير

اهل الغيره ولدك والشهامه

يمته اتذب حمل حزنك او ترتاح

او على ضحكة طفل ليلك تنامه

تعوّدنه اويه كل مصباح للعيد

الحمد لله نكلّك عالسلامة

الشاعر حازم جابر

يالصوتك ضمير وموتتك عيدك

اصعد فوك حل شعر الشمس بيدك

خل ينزل ضواها يبوس دجلة اليوم

يالمحني جرفها بدم سواعيدك

يا وجه الوطن للامل زتيناك

غصبن عالدموع اكلوبنا تريدك

يالبراسك قضية يخلدك تاريخ

القصائد ركعت وهتفت لتمجيدك

شحلاتك طير حب اطوف بالتحرير

ايد الغدر نذلة ورادت تصيدك

اسمك ثورة صار وعاش بين الناس

الوطن جمعنا هسه وراد تخليدك

الشاعر ريسان الخزعلي

ياساحة التحرير..

/ نَصب الحلم / من سومر..،

لَحدّ   14تموز شايل جمرة التاريخ :

جمره اتنشف النهران ، واليقره الرماد ايحير..!

ياساحة التحرير.. ،

كل موعد عشكَ وي دورِتج رفّة حرير.

يانصب الحلم..،

ملّينَه اشكثر ناخذ حدر طولك تصاوير :

سر / اجواد / هذا الما يضمّه البير../

نزلت كل علامات النصب ( بكتوبر ) اتوزع مناشير

واكتوبرعراقي اهناه يحن ( لكتوبر  الثوّار )..،

ياريت الكَلب باْول هبوب ايطير.

ياساحة التحرير..

رَد بينه العمر..،

 والشمس خرزه اعله الزنود اتصير../

بخت..،

ناخذ للشهيد اخبار..،

ننده نومِته ابترتيب : جاك السيل..،

سيل البحر..سيل البحر..موش انهير...

الشاعر علاء الماجد

الى الشهيد عادل الجاف

نام اعله الجرح..

واحبس زفيرك لاتسمعه الناس

واكطع حبل وصلك بالليالي وحركة الوهواس

نام اعله الجرح.. خلي النزيف يطول

ويورد عله البيبان شدة ياس

خلي عيون صبرك تفضح المضموم

وخلي الناس كلهه تصير بالشدات عباس

نام اعله الجرح..

وانشر قميصك

لافته

وراية شعب

يل بيك رفعة راس

كرادتنه تبجي بدم

داخلها وخارجها

وملاعبها وكهاويها

وسيد ادريس والنواس

كنيسة مريم العذراء

والهندية والمهدي

تتنطرك..

يل غرة جبينك

تعرك..

وتنباس

ياساس الوطن..

يل بيك يعله الساس

(التحرير) ساحة تعودت ملكاك..

(التحرير) ساحة واجت تركض ليك

حطت صورتك جوه النصب متراس

الشاعر علي الجبر

ولا ايّام مرّت وانطفت

بالوجع والحسره

تظل تشرين فكره محزّمه

بثوره

مو ذكرى

ولا ماضي انتهى وايام

متعثره

تظل تشرين ثوره يقودها

الاحرار

نور ونار

وسام بصدر كل حرّه

مو ذكرى

ولا موجة غضب مرّت

وما تنعاد

ولا اوهام بالما زاد

ولا موگد طفه بجمره

تظل تشرين شمس تضوّي

ومنوره

مو ذكرى

ولا ايام راحت هلبت

تعود

ولا احلام من بارود

ولا طيحه ولا عثره

تظل تشرين باچر من

يطر فجره

مو ذكرى

ولا هي سوالف تخلص

بضحكات

ولا دمع وبچي واهات

ولا غنوه ولا صوره ولا

واحد خلص عمره

تظل تشرين ثوره بذمّة

الفقره

مو ذكرى

لأن ما ماتت الثوره

ولا يمكن بيوم تموت

ثوره شراعها التابوت

ولا تندفن بتراب الخرافه

وتنمحي الفكره

ولا ينسى الشعب تاريخه

ونصره

مو ذكرى

باقيه بوجدان كل ثائر

جبر خاطر

ثار على الظلم والجور

عود بخور

منقوشه على الحيطان

عطر ريحان

على البيبان منتظره

على الغيمه

على الصخره

حلم اصبح حقيقه

وامل هاااااااا كبره

الشاعر عبد الاله الفهد

امشينه نكتب عالدروب

نشفو ماي الجنوب.

امشينه نكتب عالنبات

ذوله اعداء الحياة.

امشينه نكتب عالشجر

گلب المعمم حجر.

امشينه نكتب عالنجوم

  الظلم حتما مايدوم.

امشينه نكتب عالدرب

  ذوله بالمظهر حسيني

    وابفكر سيد قطب.

امشينه نكتب عالاغصان

كفر بالله الماعمل لاجل الانسان.

امشينه نكتب عالجدار

لازم انزيح الظلام

اويرجع ايشع اعلى بغداد النهار.

الشاعر حسين جهيد الحافظ

ما بين ومضة امل

او بين الحزن خنياب

بالغبشه لن الفرح

اچفوف او تدگ عالباب

اتدله سعف النخل

للگأع شال اتراب

طشاه كحلة عرس

عاشرت جفن احباب

و أعيون لو سلهمت

ليهه اليصد يرتاب

صاحت اتراب الوطن

ما يحب جدم أجناب

صاحت او صاح الصده

و الصده چان اعتاب

امن الليل يبزغ فجر

شگ ظلمة السرداب

الوطن جنة عدن

روضه او هواهه اطياب

و (اشرقت شمس الضحى)

حب عادت الغياب

لافته ابباب الوطن

و الخط ترف جذاب

رد يمه يالمبعد ترد

أشما چانت الأسباب

يمه وحگ غربتك

وي ساعة الإنجاب

عاد الوطن للوطن

وأصبح نسيمه الهاب

راية وفه للوفه

او صار الوفه جلجاب

اعيوني ضوه الخطوتك

او دمعي اليكت سچاب

ماي او نده الوردتك

من تستجير ابأب

تشرين يامهجتي

نجمه ابسمه الغياب

يصعد او ينزل مطر

ماي المطر جلاب

الشاعر سامي سلطان

هسه وبعد

باقين احنه أعلى الوعد

هسه وبعد

ما نترك الساحة ابد

هسه وبعد

نتحدى كل ظالم وغد

هسه وبعد

ماشين على الثايه ونعد

هسه وبعد

نرخص الروح ونستعد

هسه وبعد

عن حقنا احنه ما نرد

هسه وبعد

نقلع جذور المستبد

هسه وبعد

هذا  الوطن بس للمواطن للأبد

هسه وبعد