وديت العمر كله...

ورجعلي إبلا نهر.. لاماي

شلون اوصل بساتينك

ماضل بيه.. بس جرة نفس بهداي

شلون اوصلك.. إبيا حيل

وإنت الطافحه سنينك

وإنت إتغيرت.. فد نوب

وتبدل طبعك.. وثگلت موازينك

يانسمه.. التدليني عليك إبليل

واسكر من عسل تينك

ياشباچ عمري...

إمنين اجيب النوم

وإنت النوم كله.. إمساهر إبليلك

خايف.. من زعل عينك

اذا ردت اشتكيلك يوم

اخاف اجرح شعورك...

بالعتب واللوم

ادور  إعليك...

من اول ماعرفت المستحه لليوم

ادور إعليك.. بين الناس

وارسمك.. شفه مليانه دفو

مابين كاس وكاس

إنت من يا دنيه إجيت..؟

ومنهو دلاك إعله بابي

وليش ماجيت إبشبابي

يابلم.. جابك الصوبي

ونهري يابس من زمان

منين اجيب العمر...

حته ايوالم سنينك عليه

آنه حاير.. منين ابدي

شلون اجيسك..

شلون ابوس الجمر بشفافك

وإنت الحيل كله...

وآنه ذابل من زمان

وانت.. باول طيحتك

واول دلالك