المقدمة

بغداد

بغداد يمكحله ..

يم رگبة الحلوه

مبيوگ ليش الفرح

من شفتچ گوه

بغداد نجمة صبح

والليله زفتها

كحيله وشبگها الهوى

ونام ويه گذلتها 

بغداد ...

ليش إبدمع تطرز خدودچ

موچنتي ام الغنه ..

ياهو الكسر عودچ

بغداد ..

ضحكة شمس ...

والزلف هلهوله

يحبيبه ليش الدمع

صاير إلچ سوله

ليوين هذا الصبر

چاخلگچ شطوله

بغداد ..

إنتي الفرح ...

وإنتي الامل والحيل

لابد يجيلچ صبح

مهما يطول الليل

القصيدة

الى الحزب الشيوعي العراقي

تهت ابودادك غفل من چنت بالعشرين

وبعده العشگ مستمر وراح اعبر السبعين

اول حبيب انت الي والباقي اجوا بعدين

خفت الگلب ما يسع شلتك ابرمش العين

شيد اساسك (فهد) ويه الشبيبي حسين

صافي انت مثل الذهب وچفوفك انياشين

ماوصخت سمعتك او لااحد ايطلبك دين

ايديك بيضه ابشرف وفكرك ايشع شمسين

احمر علم هيبتك ابدم الشهاده انكتب

غنيت في محنتك موال باسم الشعب

گالوها اهل الفكر بيت الطرب ما خرب

وشماحچوا وافتروا تبقه انت هيبة وطن

خيال مهرة عرب مايوم هد الرسن

ثابت على موقفك غالي دفعت الثمن

انجوم راحوا غدر وهل ابسريعك حسن

ما يوم خنت الملح تشهد اسنين المضن

شامخ ولا دنگت لاويت كل المحن

فكرك ايصحي الصحو اويتجدد ويه الزمن

رادوك بس تندفن وحاديهم اللي اندفن

مات ابمذله وخزي والخسه صارت چفن

تبقه عزيز او شهم اشما لسنهم گصن

انت مسيح العصر شايل صليب الوطن

ـــــــــــــــــــــــــــــــــــــــــــــ

 ألقاها الشاعر في حفل افتتاح المهرجان