على ياديره اسولف ما وصل جنحك
وﻻضلت قوافي تكايش بجرحك
ياتل الورد بالحري الك سباح
وغيوم الشعر تتكاوت بجرحك
يا جلمة شرف وكت العهر للناس
يا حكمة مضايف عامره بصرحك
يا ملحة سوالف والمصخ ممذور
ويتيمات القوافي الما وعن صبحك
نعاوي مسودنه وعانكها شوك الليل
وطريق الموس لو خلف جرح يضحك
جبل ضليت شامخ ماعلاك السيل
ويهل حدره العقيق اليعثر بسفحك
وﻻذلت...قصيده وزاغت وزلت
وﻻدغدغ قلمكم ورقه ونسلت
عتيت القوافي الجانن معرسات
وحدتهن وحده وحده وعينهن ذلت
ركبت العاليات وناحرت بالريح
وسبوك الخيل طاوعها الهوى وجلت
بعد لسه القيامه توج لهب بركان
وكبل ليله يتهضى وناره مافلت
وعطر تل الورد يشفي الصدر لوفاح
والمعيبر عبد وزنوده ماملت
تضل عايش فرات بطينتك والماي
وتعمر بديك الدونك نعلت ...
عشت شاخص شكص خارج مدى الرماي
فوك احلام ندك روحك اتعلت ......
زاحمت المنايا وتشهد ام عريف
وجم كمرة فضيحه بليلهم حلت
يارمز الوطن يل موتتك ميلاد
وقوافيك تفك لوطكن نحلت
اجت مدرعمه وتضحك ثنايا الخيل
لو وصلن بربضه همومها نفلت
قصايد لوحجن يتفاخر الديوان
جاسيها البخت وبجودها بتلت
كل طلكة فكر تولد شعر دنياك
وصياد الهموم رويحته نشلت
يهل عايش نهر بيك الممحله تلوذ
وعكس وجه الشمس والتايهه ندلت
عشك عشت الوطن ويسجل التاريخ
وعانكت التراب وكاعك افتلت
تغطى....وكاعك امك ....
فل حضنها ونام
رعاك الله برحمته......
وقدرته الجلت