*..كان َ السريع ُ اسماً
كان َ السريع ُ إقداماً
كان َ السريع ُ شهادة ً .
وأُضيف ُ وصفاً آخر َ :
......... .........
راكض باْسمك واسرع
لو اسرع من اسمك ركضك..؟!
انت َالشايل باسمك ركضك..،
وابركضك يتلامع ومضك../
نجمه إو من تزرك َ ماترجع..،
بعيونك
ضمّيت اللمعه..ابحدّ الحنطه ايفرّكَ نبضك
كل حبّه اتلكَت بيريتك
طكَّت سنبل فوك َ الهامه..،
واندارت فوكَ امن الهامه..مجنونه ارضك
كل ترجيّه اتفرزن حسنك..،
توميلك يل ماشي ابطولك..،
لا والله ابطولك شو وازود .
والشذره امن المحبس طارت..،
حطّت بحزامك دلّاعه../
يحميك ازركَهه ابهل فوته ، كل جِنّ الدنيه إوما كضّك .
ليوين..؟
إو ليوينك جنّه..،
ابوسع اعيونك شو تتراكَص..،
من يكَدر يلحك َ وايغمضك..؟!
صبحيّه إو بجدامك فزّت..،
ما يلحكَ طارشكم يوصل..،
واتعدّه الطشّار ايهلهل ، غرّكّنّه ابطوّيات ازلوفه..،
والغيمه السوده اشما كبرت..،
نص جفّك جرهه اعله الطوفه .
يغمزلك دجله ابصوبينه..،
جَم بوسه امن الماي الفزّت..،
وانشتلت شامه إعله اجروفه .
كل / خيط / إمن اذراعك رايه..،
ع المتنين اتوزّع كَمره ، ايضوّن للمحتار ابخوفه.
ما تانيت اتوعي النايم..،
بعيونك كل نوم الدنيّه اتوعَه..،
بيها / اجنيجل /..،
والرمده اتكحلت بالبردي..،
والعميَه امنوّل مخطوفه .
حتّه اخيالك..،
وي طولك واكَف متحزم ، واثنين الشافك حسباله
سرّتك بالبارود امخضره..،
واكَماطك مايلتف ..خصرك مهره
موش أُم امكَمطتك كَالوا..،
متكَمط باسرار الفاله ، والفاله امنوّل عيّاله
توقيعك مسماري إبسومَر..، طر اللوح..،
إويا دفتر متخورس شكَّه..،
جاب ايشانه ايحنص الناصي..،
وايشانك متعلي اكَباله .
شمس الله التبرالك وكَّفت..،
عن لا ظلمه اتغطي اعيونك..،
واعيونك بالساعه اميالَه../
دارن دورتهن واتلاكَن..دكَّن ياتموز احضرني..
ياداحي الباب إحضر يومَه إو شِد احباله .
عركَان إمن الغيره النشمي..،
مو بس عركَان إمن الكَصّه..،
عركَان إويه الكَصّه اخياله .
اتفوّرماي ابحور الحركَه البيك..،
إو تتعدَّه اعله الطين الحرّي اتخبزه../
شو جانت كَبلك سيّالَه..!
...،
هذا انت َ ابكل شوفه امرايه..،
والزيبكَ لفتتات اعيونك.
جَف / خالد /بالهور ايلمّه..،
ما ظلّت كَصبه الما علّت..،
و / إغموكَتهم / وجّت هاله .
...،
مو ميّت يمونس الشفّه..،
تتبسّم باسمك ورديّه..،
لاهِيْ ابضحكه..إولاهِي ابرجفه..،
وحده إلوحده اتعلكَ صوره../
كَلبي الصوره..،
والمتحف كلّه ابفد صوره ، ما يتبدلَن..،
بس الخاطر ليش ايغيّم..،
من اذكر مو سالم طولك..!؟
والسالم من ذيجَه انزورَه.
...،
واليسلم من هاي..؟
المحفور اببطن أُمّه انزوره..