كل نبضه لبگلبهم
ورد للناس
ورياحين
شيوعيين
كل نسمه ابفجرهم
خبز للفقره
وشمس
يفرش ضواها
ابيوت المحبين
شيوعيين
كل شمعه ابسهرهم
فرح للثوره
الضوت بعيونهم
طيبين
اصفه
من الليالي الگمره
من ماي النبع
من هدوة التلحين
شيوعيين
وواحدهم
يحط دمه عله چفه
وبالملح
تسهر جروحه
ومايذل ويلين
أسرار الگمر
ذمّه ابرگبته السمره
عاشرها ابضميره
وسيَّج ضلوعه عليها
وحنَّب الها..اسنين
شيطيّحها؟
يامن لانظر عدكم
ولاعدكم
وجه ناس ودواوين
شيوعيين
يتشجر حزنهم بالرصاص
وينبض ابدمهم
عشگهم للعراق
ابفي بساتين
يعرفهم تراب الناصريه
وصبخة البصره
ورمال السماوه
وجبل سفّين
غنَّت وبسهرهم
گمرة المنشور
تركض بالشوارع
والدرابين
تضوَّي الگاع
غرّبها الحزن
والمطر
ما حّن العشبها اسنين
تمّر ابيوت
وسَّمها الفرات ابهيبته
نياشين
تسهر گمرة المنشور
تسهر بالبيادر
ع الحياطين
ياعمال
يچفوف الفلح
ياهيه
يچفوف العراقيين
هاهذا حزبكم
تضوي اصابيعه
مفاتيح الشمس
والثوره
ها هسه تدِّﮒ
بيبان الولايات
وتفيض بأغاني
اشفاف حلوات
وتعطِّر ورود
خدود حلوين
ويرِّد الفرح
لعيون المحبين
شيوعيين
كل نبضه لبگلبنه
اشموس
للناس
ورياحين