(إليك يا من سافرت بلا شكوى .. لقد كنت بيننا.. وستبقى حتى نمد لك أشرعة النصر.. لتحيا من جديد)

بچينه وما بچينه اعلييخ

دگت فوگ وجنات الزمان بدور

بچينه بدم...سرج مهره..

گبل ما ياخذ بثاره ويبشر أور

بچينه شنعتذر لو عاتبت بابل..

بجچينه شنعتذر لو عاتبت آشور

بچينه...

وما بچينه عليك...

ندريبك عدل والموت.. بيك الموت.. وانت الموت

فنّه الموت يمحمد عليك يفوت

يالخطيت بجروحك درب ثوار

يالشگيت من هام السمه للگاع سچّة نار

يمحمد.. حمامات السجن يتنشدن ظلن

يمحمد..گطايات الشلب حنن

دگلي شنعتذر للماي واطراف السعف والهور لو عتبن

يمحمد بيارغنه وضحايانه..

تمد فوگ الحياة جسور

موش احنه شمس وافكارنه

بدرب الكواين والزمان اتنور

موش احنه حلم ريان

ويرفرف على جفون الصبح راية

موش احنه نبع يطلك على دموع الحزن مايه

موش احنه شتلنا ارواحنه ابهذا الدرب ثاية

ما نبچي إعلى ذاك الفاج ماي الموت

واتعنه الوفه وما ذلن ايامه

ما نبچي إعلى ذاك الفارس الما عثرن اجدامه

ما نبچيك..هنيالك والف هنيال..

كلمن شال زاد العمر بچفوفه

ما نبچيك هنيالك والف هنيال ...

كل خيّال ..

ما هد الرسن مرة وطفح خوفه

ما نبچيك..لو ندري البواچي تفيد

ما خلينه من ماي الدمع گطرة

ما نبچيك.. لو دمع البواچي يفيد

چا فاض الفرات و(حسن) ردّ عمره

وچا ظلت ازغار كبار..

بلچن يرجع حسين وجمال وعادل وجبار

وچا دجلة بگت تنحب...

ثلث توكات...يوم بيوم

بلچن يرد من تنحب عمر (ستار)

ندريبك خذت صوغة ورحت طارش

تودي اخبارنا لحازم

تودي اخبارنا لصارم

ولكلمن شتل گلبه وطرش گبلك

تودي اخبارنا الكلمن بهذا الدرب حط رجله

يا نفحة ورد نيسان..

يا شيلة الراس وهيبة الديوان

فهد يتنطرك يمحمد ويتنطر أخبارك

دگله احنه.. هذوله احنه

بعدنه احنه

ترف راياتنه ونمشي بضوه افكارك

يمحمد دگله احنه

هذوله احنه

زلم خشنين تدرينه

نرش اجروحنه بماي وملح

ما يوم ذلينه

نفك ليل الحزن بالدم ..ولا نهتم..

يشامت روح دوّر

كل تواريخ النضال وشوف أسامينه

يشامت فوگ هامات النجم والغيم تلگينه

يشامت روح وانشد ثورة أكتوبر

وانشد كل كتر بالصين

وانشد سچة الغابات

تلگه بكل شبر منها يشع فوگ العشب دمنه

حبال الصلب تتباهه گَلايد فوگ رگبتنا

يشامت روح وانشــد عالجسر تذكار وثبتنا

هذوله احنه

بعدنه احنه

خضيري الهور يتغنه بسوالفنه

ومدّ الماي بينه يفيض لو رفت شفايفنه

وحگ بيرغ حزبنا ... وهامة الطيبين..

تشهد بينه من ذاك الوكت لليوم دنيتنا

أبد ما ردت اجدام العزم بينه

ولا خفتت مواگدنا

وهاي الشمس تضوي بنور چلمتنه

بگول وفعل ذوله أحنا...

تشبه صفة الفالات صفتنا

يمحمد شوصفك والوصف يگصر

ومهر الصوت يمحمد...

على اشفاف الدهر يعثر

يمحمد شوصف بيك

وانته على الوصف تكبر

يالعمرك نبع تاريخ

ولد الولد لو مرت يفيض الزود بيك أكثر

يالمديت روحك للفجر معبر

يمحمد بچينه وما بچينه عليك

يا شمعة عرس يالدمك زواگه

يمحمد بچينه بجفن الموادع

وكل احنا إعلى هذي الدرب نتلاكه

يمحمد يريت أردود

لينه تعود

واشمّن كل كتر

بيه نامن جروحك واشمنك

واشهگ حيل ... حيل الحيل

ريت انه والف يا ريت

عيني توچّد اجدامك واتبعنك..

ــــــــــــــــــــــــــــــــــــــ

* الشهيد محمد الخضري الذي اغتيل على أيدي جلاوزة البعث الفاشي يوم 22 آذار1970 ووجدت جثته بالقرب من مدينة “بلد” وقد اخترقتها أكثر من أربعين اطلاقة.

**ينقل عن القاضي الاستاذ زهير كاظم عبود قوله: بعد أن تُليت القصيدة في مجلس الفاتحة المقام على روح الشهيد، تقدم مني أحد الشباب وطلب مني القصيدة التي ألقاها صاحبي توا. وحين سألته عما يريد بها قال نريد ان ننشرها في صحافتنا. وقدم نفسه لي بانه شمران الياسري / أبو كاطع. وقد نشرت القصيدة بعد ثلاثة أيام في “الثقافة الجديدة”.