الى روح العظيم الخالد فهد ، بمناسبة ١٤ شباط يوم الشهيد الشيوعي
فهد بويه
بعدنه ابذاك عهدك ذاك
او نبقه عالعهد وياك
بلابل للوفه انغرد
جيل الجيل نترجاك
صوتك شوگ
بگلوب الرفاق
او چلمتك كبرت عراق
او. بالنبض تسري اويه دمنه
بالشيوعيه العزيزه
و ابشرف دمك حلفنه
او عالنجم خطينه اسمنه
وانته ٠٠ ذاك أنته الچبير
البيك متباهي فكرنه
ساريه او أسمك علمنه
منجل او چاكوچ احنه
صرنه او صارت فخرنه
اربينه او اعليهه انفطمنه
انتشينه ابعطر دربك
اشمحله يالدربك دربنه
بيه غنينه محنه
ماهو منه
الما يحب گاعه او ناسه
ما هو منه
فهد بويه
برعمك ذاك الزغير
ابناصريتك صار شجره
حدر ظلهه طگ حزبنه
ابكل شموخ أبكل أمانه
للوطن عمره او زمانه
للشعب شدة احزامه
طرزت شوغة أيامه
غصن زيتون او حمامه
صارت الدنيه منار
او لجدام وادمنه مسار
بيه تتباهه السوالف
اسمه سالوفة مضايف
فهد بويه
صده صوتك لسه بينه
أغنية اتعطر حچينه
والشيوعيه يا فهدنه
دنيه اتظلل علينه
او هيه من الموت أقوه
و اعله أمن اعواد المشانق
بالمناجل والمطارق
ابشوگنه انردد نشيد
يحلم ابعالم جديد
( وطن حر وشعب سعيد)