(موناليزا .. سحر .. اكرام)
1- موناليزا
چانت نسمه
لكن أترف من كل نسمه
اِو چانت نجمه
اِتضوي أكثر من كل نجمه
اِو چانت چلمه
شالت كل أسرار الدنيه اِبهاي الچلمه
تلعب طفيره اِعله الموت اِو محلاهه
شوگ الدنيه اِيطگ ويّاهه
وتغنيله ٠٠٠
اِبحس فيروز أعذب نغمه
موسيقه بتهوفن ضحكتهه
چلمة قديس اِو أكثر چلمتهه
اِبچفهه الترفه
اِتلاوت وي الطلقه اِبعفّه
من دمهه طگ الجبل
بستان اِو حب هلهل سفحه
اِبريشة دافنشي اِنرسمت لوحه
بس يا لوحه .. لوحه اِعزيزه
او بسم الحب اِتسمت موناليزه
2- سحر بت الحزب
وردة روز ..
النده ..
يرتاح من يوصل شفايفهه
يحضنهه الگمر فرحان
النجم كل النجم
يمشي ابطوارفهه
شربت من فرات الخير ماي
وشربت العفه
اِو زهت وردة محنه
اِو شوگ عالضفه
سجيه الطيب اِلهه والوفه عنوان
سحر بت الحزب
بت الأماني وردة الاِسكان
كفو أم محمد ونعمين
يغصن الزين
ما خضر أبد بس زين
نزف دمچ ( جدي )
واضح ضوه اِلكل عين
نزف دمچ سوط
خافوا منه جلادين
نزف دمچ كتب
عالمشنقه
اِعله الموت
على اِزلوف الگمر.
.عالشمس للزينين
الحياة اِبذل مهانه
الموت بالعز
شيمة الطيبين
3 - إكرام سعدون
عرس إو منده
ماي إو طاس
وإچفوف إبنيه إمحنايه
إبعطر الياس
إحديثه ...
إحديثه إبعمر الورده
إتغنّي ...
إتغنّي .. إبحب الناس
هيچ إو هيچ
إو أعرف هيچ
مو حبيت إشلون ... إشلون
الدنيه إتهون .. الموت إيهون
بس أتنازل وأترك دربي
لا متهون ..
لا متهون
آنه إكرام .. إو إسمي إكرام
وأعرف .. وادري
إشيعني إكرام
يعني حب او الاحترام
للأمام او للأمان
والقضيه ..
إلقدمت روحي إلأجلهه
هيّه حريه أو سلام
روحي حريه إو سلام