حزبنه إولاية الطيبين
يدنيه يا ضوه العين
شطشنلك يعيدي أبيوم عيدك
أطش الروح تدري روحي بيدك
اعشگنك مثل عشگ الملح للطين
وأعلگلك شموع الفرح بمحبتك تسعين
حزبنه يا حزبنه ياضوه العين
****
يا حزب الأمل والعمل والإصلاح
يا حزب الشغيله أوعامل إو فلاح
يا منبع الطيبه إو للدرب مصباح
إسمك يلالي أنوار
يا قيلة ..الأحرار
أسمك شمس بالليل وهلال أبو عيدين
اسنيني صواني شمع العيدك التسعين
حزبنه يا حزبنه ياضوه العين
****
حزبنه يا حزبنه يا هلال العيد
اشما يمر بيك الوكت انته جديد
حرالوطن والشعب شعب سعيد
إبوجداني اسمك نسمه
بالفرح طگت نغمه
وسنين عمري وفه طگن الك كترين
وعيون تنثر فرح العيدك التسعين
حزبنه يا حزبنه ياضوه العين
* *
شمسين اسم الحزب ما ينضم أبغربيل
إسنينه طگن صبح ضوَّن ظلام الليل
حيله تچيه إو سند للرگد بيه الحيل
تمطر محنه وفه آيا حزب صارم
ساسك سلام أوفهد والحيدري إو حازم
راسك أبد ما يطخ حزب الشيوعيين
منذور عمري شمع العيدك التسعين
حزبنه يا حزبنه ياضوه العين